Трамп Эрдоғандан Украина можаросида воситачилик қилишни сўради
Ҳозирча ушбу таклифнинг жавоби расман ошкор этилмаган.
АҚШ президенти Доналд Трамп Туркия президенти Ражаб Тоййиб Эрдоғандан Россия ва Украина ўртасидаги можаро бўйича музокараларда воситачилик қилишни сўраган.
Туркия президент маъмурияти икки етакчи ўртасида бўлиб ўтган учрашувни тасдиқлаган ва у "самарали музокаралар" деб баҳоланган. Маълум қилинишича, Трамп Эрдоғаннинг Россия президенти Владимир Путин ҳамда Украина президенти Владимир Зеленский билан бирдек мулоқот ўрнатиш салоҳиятини юқори баҳолаган.
Эрдоған ҳозиргача бир неча бор Украина можаросида ўзини воситачи сифатида кўрсатган, жумладан, Қора денгиз орқали дон ташиш бўйича келишувда ҳам Туркия муҳим роль ўйнаган эди.
Бироқ ҳозирча Эрдоған Трампнинг бу таклифига қандай жавоб бергани расман ошкор қилинмаган.
