Европага Россия газини қайтариш режалаштирилмоқда
АҚШ воситачилигида музокаралар бошланди.
Reuters агентлигининг хабарига кўра, Вашингтон ва Москва вакиллари Россия газини Европа Иттифоқига қайта экспорт қилиш масаласида норасмий музокаралар ўтказган. Мулоқотда АҚШ воситачи сифатида иштирок этаётгани ва музокаралар фонида “Шимолий оқим–2” газ қувури орқали газ етказиб беришни тиклаш ғояси кўриб чиқилаётгани айтилмоқда.
Агентлик манбаларига кўра, Россиянинг “Газпром” компанияси Германия учун йирик чегирмалар таклиф қилишга тайёр ва илгари тузилган узоқ муддатли шартномалардан фарқли ўлароқ, қисқа — икки йиллик контрактлар тузишни ҳам истисно қилмаяпти.
Гарчи Европа давлатлари энергия манбаларини диверсификация қилишга интилаётган бўлсада, Европа саноатининг баъзи вакиллари, агар Украинада ўт очишни тўхтатиш бўйича келишув имзоланса, Россия газига қайтишга тайёрлигини тан олмоқда.
Аввалроқ Германиянинг Bild нашри ҳам АҚШ ва Россия ўртасидаги мазкур музокараларнинг бораётганини, шунингдек, Вашингтоннинг ушбу жараёнда оралиқ воситачи бўлиши мумкинлигини хабар қилган эди.
