Мексика Google'ни судга берди
Харитада кўрфаз номининг ўзгартирилишига норозилик билдирилди.
Мексика ҳукумати Google компаниясига қарши суд даъвоси билан чиқди. Бунга сабаб – Google Хариталар хизматида “Мексика кўрфази” номининг “Америка кўрфази” деб ўзгартирилгани бўлди. Бу ҳақда мамлакат президенти Клаудия Шейнбаум маълум қилди.
Шейнбаум баёнотига кўра, АҚШ ҳукумати фақат ўзининг қитъа шелф ҳудудига ном бериш ҳуқуқига эга, аммо бутун кўрфаз ҳудудини ўзгартириш ваколатига эга эмас.
"АҚШ истаса, ўз қисмига қандай ном берса беради. Аммо Мексикага тегишли қисмни ўзгартириш ҳеч қандай халқаро ҳуқуққа тўғри келмайди", – деди у.
Маълумот учун, АҚШ президенти Доналд Трамп инаугурациядан кўп ўтмай, 2025 йил январь ойида Мексика кўрфазини расмий равишда “Америка кўрфази” деб қайта номлаш ҳақидаги фармонни имзолаган эди.
