Трамп Фаластин давлатини тан олиши мумкин
Саудия саммитида муҳим баёнот эълон қилиниши кутилмоқда.
Маълум қилинишича, АҚШ президенти Доналд Трамп Саудия Арабистонида бўлиб ўтадиган йирик халқаро саммитда Фаластин давлатини расман тан олишини эълон қилиши мумкин. Бу ҳақда The Media Line агентлигига таяниб, Форс кўрфази давлатларидан бирининг исми сир тутилган дипломатик манбаси маълум қилган.
Манбага кўра, Трамп Фаластин давлатини тан олиш бўйича декларация тақдим этиши режалаштирилган. Мазкур ҳужжатда Фаластин давлати тузилиши, аммо бу жараёнга ҲАМАС ҳаракати жалб этилмаслиги кўзда тутилган.
“Агар АҚШ Фаластинни тан олса, бу Яқин Шарқдаги геосиёсий мувозанатни тубдан ўзгартириши мумкин. Бу, шунингдек, “Иброҳим келишувлари”га янги давлатларнинг қўшилишига йўл очади”, — дея таъкидланади.
Саммит доирасида иқтисодий келишувлар ҳам эълон қилиниши кутилмоқда. Хусусан, Форс кўрфази давлатлари учун АҚШнинг бож тарифларидан имтиёзлар тақдим этилиши мумкинлиги билдирилган.
