Европа Россия раҳбарларини суд қилмоқчи

 

Хабарларга кўра, Евроиттифоқнинг 27 аъзо давлатидан 20 таси Россиянинг сиёсий ва ҳарбий раҳбариятини жавобгарликка тортиш учун махсус халқаро трибунал ташкил этилиши ғоясини маъқуллади. Бугун Украинанинг Лвов шаҳрида “Асосий гуруҳ” деб номланган ташаббус доирасидаги давлатлар ташқи ишлар вазирлари ушбу трибунал бўйича декларацияни имзолади.

 

Евроиттифоқ расмийсининг айтишича, трибунал 20–30 нафар юқори мартабали шахсни жавобгарликка тортишни назарда тутади. Суд жараёнлари юзма-юз ёки сиртдан бўлиб ўтади. Айбланувчиларга 30 йилгача озодликдан маҳрум қилиш ёки оғир ҳолатларда умрбод қамоқ жазоси қўлланилиши мумкин.

 

АҚШ бу декларацияни имзоламаган давлатлар қаторида қолмоқда. Бироқ Брюсселда, Вашингтон ҳам якунда ташаббусни қўллаб-қувватлайди деган умид бор. Полша ташқи ишлар вазири Радослав Сикорский бу борада шундай деди: “АҚШнинг трибунални тузишдаги суст иштироки — бу Трамп маъмуриятининг Путинга тақдим этган кўплаб имтиёзларидан бири”.

 

Келгуси қадам сифатида, Украина президенти Владимир Зеленский ушбу трибунал бўйича Европа Кенгаши бош котибига расмий мурожаат йўллаши кутилмоқда. Бу мурожаат 13–14 май кунлари бўлиб ўтадиган йиғилишда тақдим этилади. Шундан сўнг Европа Кенгаши вазирлар қўмитаси расмий жараённи бошлаши керак.

 

Мазкур трибунал Украина ҳудудига бостириб кириш — яъни тажовуз жинояти юзасидан ташкил этилади ва норасмий равишда “Путин трибунали” номи билан тилга олинмоқда. Аммо ДВ манбаларига кўра, Россия президенти, бош вазири ва ташқи ишлар вазири ҳозирда амалдаги лавозимларида бўлганлари сабабли “шахсий иммунитет” билан ҳимояланган.