Украина билан музокаралар 15 май куни бўлиши мумкин
Путин Истанбулда тўғридан-тўғри музокаралар таклифини берди.
Россия президенти Владимир Путин Украина билан тўғридан-тўғри музокараларни 15 май куни Истанбулда давом эттиришни таклиф қилди. Бу ҳақда у Кремлда бўлиб ўтган матбуот анжуманида баёнот берди.
Путиннинг айтишича, у Туркия президенти Ражаб Тоййиб Эрдўғон билан музокаралар масаласини муҳокама қилади ҳамда Истанбулда янги музокаралар босқичи учун платформа яратишни сўрайди.
“Россия жиддий музокараларга тайёр. Бу жараён давомида ўт очишни тўхтатиш бўйича келишувга эришиш эҳтимоли ҳам бор. Энди қарор Киев ва унинг ташқи кураторларига боғлиқ”, — деди Путин.
У, шунингдек, Россия АҚШ президенти Доналд Трамп маъмуриятига тинчликка эришиш йўлида кўрсатган воситачилик саъй-ҳаракатлари учун миннатдорлик билдирди.
Путин, матбуот анжумани якунида, жорий йилнинг сентябрь ойида Хитойга расмий ташриф буюришини тасдиқлади.
