Эрон ва АҚШ ўртасида ядро музокаралари давом этмоқда
Ароқчий: “Эрон ядровий ҳуқуқларидан воз кечмайди”.
Хабарларга кўра, Эрон ва АҚШ ядро дастури бўйича музокараларнинг навбатдаги — тўртинчи босқичи Уммон пойтахти Маскат шаҳрида бўлиб ўтди. Музокараларда Эрон томонини Ташқи ишлар вазири ўринбосари Аббос Ароқчий, АҚШ томонини эса Президентнинг махсус вакили Стив Уиткофф вакиллик қилди.
8 май куни Уиткофф “АҚШ Эронни уранни бойитишни тўхтатишга ва барча ядровий иншоотларни бутунлай демонтаж қилишга чақирмоқда. Акс ҳолда, Вашингтон бошқа йўлни танлайди", дея қатъий баёнот берди.
10 май куни Ароқчий бунга жавобан шундай деди: “Эрон ўзининг ҳеч бир ядровий ҳуқуқидан воз кечмайди”.
Олдинги босқичдаги музокаралар 12, 19 ва 26 апрель кунлари Маскат ва Рим шаҳарларида ўтказилган эди. Музокараларнинг асосий мақсади — Эроннинг ядровий қурол ишлаб чиқишининг олдини олиш ва бунинг эвазига АҚШ томонидан киритилган иқтисодий санкцияларни бекор қилиш бўйича янги келишувга эришишдир.
