Путиннинг таклифи – дипломатик тузоқми?

 

15 май куни Россия президенти Владимир Путиннинг Истанбулда Украина билан тўғридан-тўғри музокаралар ўтказиш таклифи жамоатчилик ва экспертлар орасида турлича муносабатларга сабаб бўлди. Германиянинг йирик нашри BILD бош муҳаррири Паул Ронтшаймер ушбу таклифни "дипломатик тузоқ" деб атади ва Россиянинг асл мақсадлари борасида жиддий шубҳалар билдирди.

 

Ронтшаймернинг фикрича, Ғарб давлатлари — хусусан АҚШ, Европа Иттифоқи аъзолари ва Украина — ҳозир мураккаб дипломатик босқичда турибди. Яқинда Киевда ўтказилган учрашувда Европа раҳбарлари ва АҚШ президенти Доналд Трамп иштирокида камида 30 кунлик ўт очишни тўхтатиш бўйича қатъий талаб билдирилган эди. Акс ҳолда, Россияга қарши янги санкциялар жорий этилиши мумкин.

 

Путин эса ўт очишни тўхтатмасдан тўғридан-тўғри музокараларни бошлашга тайёрлигини маълум қилди. Украина президенти Владимир Зеленский, Германия канцлери Фридрих Мерс ва Франция президенти Эммануэл Макрон бу ёндашувни рад этди. Улар тинчлик музокаралари фақат ҳарбий ҳаракатлар тўхтатилганидан кейингина амалга оширилиши мумкинлигини таъкидладилар.

 

Экспертлар фикрича, Кремль бу таклиф орқали АҚШ ва Европа ўртасида низо келтиришга уринмоқда. Ғарб разведка идораларининг билдиришича, Россия урушни давом эттириш ниятида бўлиб, босиб олинган тўрт вилоят — Донетск, Луганск, Херсон ва Запороже — устидан назоратни сақлаб қолишга интилмоқда.

 

Европа етакчилари айни пайтда АҚШ президенти Доналд Трамп билан доимий алоқада бўлиб, уни Россиянинг сиёсий манипуляцияларидан огоҳ қилишга ҳаракат қилмоқда. Бу борада Франция президенти Эммануэл Макрон муҳим роль ўйнамоқда.

 

Мутахассислар таъкидлашича, агар Путин музокаралар орқали Ғарб бирлигини заифлаштиришга эришса, бу Украина учун салбий оқибатларга олиб келиши мумкин. Шу сабабли, халқаро ҳамжамиятнинг асосий вазифаси — муросага эмас, барқарор тинчликка эришишдир.