Трамп дориларнинг нархини туширишни режалаштирмоқда

 

АҚШ президенти Доналд Трамп мамлакатда рецепт бўйича бериладиган дорилар нархини 30–80 фоизгача пасайтириш режасини эълон қилди. У бу ташаббусни “мамлакат тарихидаги энг таъсирли фармонлардан бири” билан расмийлаштиришни режалаштираётганини айтди.

 

Трамп ўзининг Truth Social тармоғидаги баёнотида қуйидагиларни маълум қилди: “Йиллар давомида одамлар бир саволни сўради: нима учун АҚШда айни дорилар бошқа давлатларга қараганда 5–10 баробар қимматроқ? Энди бу адолатсизликка барҳам берилади. Эртага эрталаб 9:00 да Оқ уйда мен тарихий фармонни имзолайман. Натижада дорилар нархи деярли дарҳол 30–80 фоизгача тушади”.

 

Трампнинг таъкидлашича, бу қарор орқали АҚШ фуқаролари бошқа давлатлар билан тенг нархларда дори харид қилиш имкониятига эга бўлади. “Агар бирор дори бирор мамлакатда 1 доллар турса, АҚШда ҳам у худди шунча бўлиши керак”, деди у.

 

Ҳозирча ушбу қарор қандай тартибда амалга оширилиши аниқ эмас. АҚШда дори нархларини марказлашган тартибда назорат қилиш тизими мавжуд эмас. Шунингдек, ушбу чора фақат давлат томонидан молиялаштириладиган Медисаре дастурига тааллуқлими ёки кенгроқ қамровга эга бўлиши ҳам номаълум. Экспертлар бу ташаббус йирик фармацевтика компаниялари томонидан қаршиликка учраши мумкинлигини таъкидламоқда.