Бурятияда кучли ўрмон ёнғинлари кузатилмоқда
50 минг гектардан ортиқ ўрмон ёнғинлари сабаб фавқулодда ҳолат эълон қилинган.
Бурятия Республикасида содир бўлаётган кенг кўламли ўрмон ёнғинлари туфайли 13 майдан бошлаб минтақавий фавқулодда вазият режими жорий этилди. Бу ҳақда Россия Федерацияси таркибидаги Бурятия Республикасининг ўрмон хўжалиги агентлиги (RALH) маълум қилди.
RALH хабарига кўра, республика миқёсидаги фавқулодда вазиятлар комиссияси қарорига биноан ўрмон ҳудудларига кириш тўлиқ тақиқланган. Айни дамда Боунтовский Эвенки ва Еравнин туманларида умумий майдони 53 208 гектарни ташкил этувчи 22 та ёнғин қайд этилган.
Агентлик кучли шамол ва ёнғин жойларининг ёндашиб бўлмайдиган ҳудудларда жойлашгани туфайли ўт ўчириш ишларини мураккаблаштираётганини билдирган. Сўнгги бир кун ичида 16,6 минг гектар ёнғин майдони зарарсизлантирилди, бироқ айни вақтда Боунтовский Эвенки туманида яна тўртта янги ёнғин аниқланган.
RALH маълумотига кўра, ёнғинларнинг аксарияти — 90 фоиздан ортиғи — инсон омилига боғлиқ бўлиб, кўпинча эҳтиётсизлик ва бепарволик оқибатида юзага келмоқда. Ҳозирда ўт ўчириш ишларига 533 нафар ходим жалб этилган.
Фавқулодда ҳолат эълон қилинишига сабаб бўлган омиллардан бири — ёнғин хавфи юқори бўлган мавсум бошланганидан бери 174 та ўрмон ёнғинининг рўйхатга олинганидир.
