Фонд бозорларида тикланиш бошланди
90 кунлик келишув глобал индексларга ижобий таъсир кўрсатмоқда.
Апрель ойида АҚШ президенти Доналд Трамп томонидан жорий этилган божлар сабаб пасайган глобал биржа индекслари эндиликда тикланмоқда.
Тикланиш 10–11 май кунлари Женевада бўлиб ўтган АҚШ ва Хитой ўртасидаги музокаралардан сўнг бошланди. Музокаралар якунида томонлар божларни 90 кун муддатга ўзаро камайтиришга келишиб олдилар. Бу вақт давомида улар савдо сиёсатидаги келишмовчиликларни ҳал қилиш мақсадида музокараларни давом эттиради.
Келишув тафсилотлари душанба куни ошкор этилган бўлса, сешанба куни ўнлаб йирик биржа индекслари ўсишни бошлади. Бу жараён инвесторлар томонидан ижобий қабул қилинмоқда.
Хусусан, АҚШнинг S&P 500 индекси апрель ойидаги пасайишдан кейин 3,1 фоизга ошди. Савдо урушидан энг кўп зарар кўрган Хитой, Канада ва Гонконг биржалари ҳам тикланиш ҳолатида. Шунингдек, Буюк Британия ва Франциянинг асосий фонд индекслари ҳам тикланишга яқинлашган.
“Узоқ ва пухта музокаралар давом этмоқда, лекин бозорда кутилган фалокат юз бермагани — ижобий ҳолат,” — деди Глобалт Инвестментс компанияси инвестиция менежери Томас Мартин.
