АҚШ–Саудия ўртасида йирик инвестиция битими имзоланди
Саудия Арабистони АҚШ иқтисодиётига 600 миллиард доллар сармоя киритиш мажбуриятини олди.
АҚШ ва Саудия Арабистони ўртасида тарихий аҳамиятга эга бўлган, умумий қиймати 600 миллиард долларни ташкил этувчи йирик шартнома имзоланди. Бу ҳақда Оқ уй расмий сайти орқали маълумот берилди.
Шартнома АҚШ президенти Доналд Трампнинг Ар-Риёдга ташрифи давомида эълон қилинган. Келишув мудофаа, энергетика, хавфсизлик ва ноёб металларга оид соҳаларни қамраб олган бўлиб, АҚШ компанияларига стратегик ресурсларга кенгроқ кириш имконини яратади.
Ушбу йирик инвестиция орқали Саудия Арабистони АҚШ иқтисодиётига кучли молиявий туртки беришни мақсад қилган. Шунингдек, бу икки давлат ўртасидаги ҳарбий ва иқтисодий алоқаларни янада мустаҳкамлаши кутилмоқда.
Трамп сафари доирасида 15 май куни Қатар пойтахти Доҳага, ундан кейин эса Бирлашган Араб Амирликларига ташриф буюради. Бу учрашувларда энергия хавфсизлиги ва ҳарбий ҳамкорлик асосий муҳокама мавзуси бўлади.
