АҚШ вакиллари Истанбулда бўладиган музокараларга тайёрланмоқда
Марко Рубио ва Трампнинг вакиллари 16 май куни Истанбулга боради.
АҚШ давлат котиби Марко Рубио ва президент Доналд Трампнинг махсус вакиллари Стив Уиткоф ҳамда Кит Келлог 16 май куни Истанбулга ташриф буюради. Бу ҳақда Reuters мухбири Фил Стюарт хабар берди. Маълумотга кўра, Уиткофф бу ҳақда Дохада журналистларга маълум қилган.
Уиткоффнинг айтишича, у Россия президенти Владимир Путиннинг музокараларда иштирок этишидан хабардор эмас. Шу билан бирга, аввалроқ Россия ва Украина 15 май куни Туркияда тўғридан-тўғри музокараларни бошлаши кутилаётгани ҳақида хабарлар тарқалган эди. Бу таклиф Россия президенти Владимир Путин томонидан илгари сурилган, аммо учрашув қандай шаклда ўтиши ҳали аниқ эмас.
Украина президенти Владимир Зеленский эса, 15 май куни Туркияда Путин билан юзма-юз учрашишга тайёрлигини билдирган.
Хабарларга кўра, кутилаётган музокараларда АҚШ делегациясини юқори мартабали расмийлар — Марко Рубио, Стив Уиткоф ва Кит Келлог вакиллик қилади. Бу ташриф, музокараларнинг халқаро миқёсда қанчалик муҳим эканини кўрсатмоқда.
