Рим Папаси Россия ва Украина ўртасида воситачи бўлишга тайёр
Папа Лео ХИВ: “Дунёда тинчлик учун бор кучимни сарфлайман”.
Бугун, 14 май куни, Рим Папаси Лео ХИВ Украинадаги урушга барҳам бериш йўлида муҳим ташаббус билан чиқди. У Россия ва Украина ўртасидаги музокараларда воситачи бўлишга тайёр эканини билдириб, дунёда ниҳоят тинчлик ва адолат ҳукмрон бўлиши учун қўлидан келган барча ишни қилишини айтди.
Бу баёнот Папа томонидан 2025 йилда 23 та Шарқий католик черковларига бағишланган Муқаддас Юбилей йили тадбирлари доирасида билдирилган. У ўз чиқишида дунёнинг турли можароли ҳудудларига эътибор қаратди: “Муқаддас ердан то Украинагача, Ливандан Суриягача, Яқин Шарқдан тортиб Тиграй ва Кавказгача — биз ҳанузгача зўравонлик, қуролли тўқнашувлар ва адолатсизликлар гувоҳи бўлмоқдамиз. Мен тинчлик учун, бу дунёда якдиллик устувор бўлиши учун астойдил ҳаракат қиламан”, — деди Папа.
Лео ХИВ, шунингдек, барча диндорларни қуролли можаролар гирдобида қолган мамлакатлар тинчлиги ва фаровонлиги учун ибодат қилишга чақирди. Хабарларга кўра, Муқаддас Тахт халқлар ўртасида мулоқотни йўлга қўйиш орқали умид, қадр-қиммат ва тинчликни тиклашга доимо тайёр эканини яна бир бор тасдиқлади.
“Дунё халқлари тинчликни истамоқда. Мен уларнинг раҳбарларига чин дилдан мурожаат қиламан - келинг, учрашиб музокаралар олиб борайлик”, — дея сўзини якунлади Папа Лео ХИВ.
