Тожикистонда “лайк” учун жазолаш тартиби бекор қилинди
Эмомали Раҳмон “лайк” учун жиноий жавобгарликни бекор қилувчи қонунни имзолади.
Тожикистон президенти Эмомали Раҳмон 2025 йил 14 май куни “Тожикистон Республикаси Жиноят кодексига қўшимчалар киритиш тўғрисида”ги қонунни имзолади. Мазкур ҳужжатга кўра, эндиликда ижтимоий тармоқларда “лайк” босиш ёки шу каби белгилар орқали муносабат билдирганлик учун жиноий жавобгарлик бекор қилинади.
2018 йилдан бери амалда бўлган тартибга биноан, экстремист деб топилган манбаларнинг материалларини ёқлаб “лайк” босиш ёки улашиш терроризмни қўллаб-қувватлаш сифатида талқин қилинар, ва бу ҳолат учун фуқаролар 15 йилгача озодликдан маҳрум этилиши мумкин эди. Расман маълум қилинишича, ушбу норма асосида 1500 дан ортиқ киши жиноий жавобгарликка тортилган.
Янги қонун бу каби ҳолатларга нисбатан жазо чораларини юмшатади. Бироқ, экстремистик ташкилот деб топилган манбалар томонидан тарқатилган контентга “лайк” босиш ёки уни улашиш ҳолатлари ҳали ҳамон жиноят сифатида баҳоланади. Шундай экан, янги ўзгариш умумий юмшатиш бўлсада, хавфли контент билан боғлиқ эҳтиёт чоралари сақланиб қолмоқда.
