Европа Туркия билан алоқаларни мустаҳкамлашга интилмоқда
Геосиёсий ўзгаришлар фонида Европа ва Туркия яқинлашмоқда.
Европа Иттифоқи Туркия билан алоқаларни янада мустаҳкамлашга ҳаракат қилмоқда. Бунга АҚШ президенти Доналд Трампнинг Европа хавфсизлигига нисбатан бефарқ ёндашуви асосий сабаб бўлаётгани таъкидланмоқда. Financial Times нашрининг манбаларига кўра, ЙИ ҳозирги глобал шароитда ўз хавфсизлигини таъминлашда Туркия билан яқин ҳамкорликни зарур деб ҳисобламоқда.
Ҳисоботда айтилишича, Туркия ташқи ишлар вазири ва Миллий разведка хизматининг собиқ раҳбари Хоқон Фидан ЙИ мудофаа ташаббусларига мунтазам таклиф қилинмоқда. Бу эса икки томонлама ҳамкорликнинг тобора чуқурлашиб бораётганидан далолат беради.
Ғарб дипломатлардан бирининг таъкидлашича, Европа мамлакатлари Анқара билан турли соҳаларда янги ҳамкорлик йўналишларини йўлга қўйишга тайёр. Бу ёндашув мавжуд сиёсий муҳитда Туркиянинг минтақадаги ўрни ва аҳамиятини яна бир бор тасдиқлайди.
Президент Ражаб Тоййиб Эрдўған сўзларига кўра, Европа хавфсизлигини Туркиясиз, айниқса унинг ривожланган мудофаа саноатисиз тасаввур қилиш мумкин эмас. У яқинда Анталия Дипломатик форумида ЙИга мурожаат қилиб, минтақавий барқарорликни истар экан, Туркияни тўлақонли аъзо сифатида қабул қилиши кераклигини билдирган эди.
Шунингдек, Эрдўған Туркиянинг ЙИга аъзоликдан воз кечаётгани ҳақидаги танқидларни қатъиян рад этиб, бу йўл мамлакатнинг асосий стратегик мақсади бўлиб қолаётганини таъкидлади.
