AI ёрдамида Трампнинг хатоси тузатилди
Саудия валиаҳд шаҳзодаси билан учрашувда Трамп қаҳва ичмаган эди.
Саудия Арабистонига расмий ташрифи чоғида АҚШ президенти Доналд Трампнинг валиаҳд шаҳзода Муҳаммад бин Салмон билан учрашуви пайтида юз берган ноқулай ҳолатни сунъий интеллект ёрдамида бартараф этишга тўғри келди.
Қироллик саройида бўлиб ўтган саломлашув маросими давомида анъанавий Араб қаҳваси – гаҳва таклиф қилинди. Бу ичимлик Саудия маданиятида меҳмондўстлик рамзи ҳисобланади. Бироқ, Трамп уни ичишдан бош тортди, бу эса мезбон мамлакатда одобсизлик ва ҳурматсизлик белгиси сифатида қабул қилинади.
Ноқулайликнинг олдини олиш ва Америка раҳбарини шарманда қилмаслик мақсадида, Ал Арабия журналистлари сунъий интеллектдан фойдаланган ҳолда видеони қайта ишлади. AI ёрдамида яратилинган тасвирда Трамп қаҳвани ичаётгани кўрсатилган ва у оммага эфирда тақдим этилган.
Бироқ сунъий таҳрир изсиз ўтмаган: томошабинлар айрим тафсилотларга эътибор қаратган. Жумладан, стулларнинг қўлтиқ таянчлари икки кадрда фарқ қилади, шунингдек, шаҳзоданинг ўнг томонида ўтирган одам ҳам алмашган.
