Германия армияси Европадаги энг кучли армияга айланади

 

Германия канцлери Фридрих Мертс ўзининг Бундестагдаги инаугурация нутқида мамлакат Қуролли кучларини Европадаги энг кучли армияга айлантиришни ҳукуматининг асосий мақсадларидан бири сифатида эълон қилди. У Бундесвернинг ҳарбий салоҳиятини ошириш учун зарур барча молиявий ва сиёсий воситалар сафарбар этилишини ваъда қилди.

 

Маълум қилинишича, канцлер Мертс ҳукмрон коалиция – консерватив СДУ/ССУ блоки ва Германия социал-демократик партияси (СПД) – Қуролли кучлар учун етарли маблағ ажратилишини таъминлашини таъкидлади. Бундесвер сафини кенгайтириш учун “янги ва жозибали ихтиёрий ҳарбий хизмат” жорий этилиши режалаштирилмоқда.

 

Берлин Европа хавфсизлиги борасида кўпроқ жавобгарликни зиммасига олишга тайёрлигини билдирар экан, Германия НАТО стандартларига мувофиқ ҳарбий харажатларини ЯИМнинг камида 2 фоизигача етказишни мақсад қилган. 2025 йилдан бошлаб ҳарбий бюджет 2024 йилдаги 52 миллиард еврога нисбатан 67,4 миллиард еврога кўтарилиши кўзда тутилган. Бу маблағлар собиқ канцлер Олаф Шолтс томонидан ташкил этилган 100 миллиард евролик махсус фонддан ҳам қўшимча қўллаб-қувватланади.

 

Канцлер шунингдек, “швед модели” асосида ихтиёрий ҳарбий хизматни қайта тиклаш ғоясини илгари сурди. Мудофаа вазири вазифасини бажарувчи Борис Писториус томонидан илгари сурилган бу модель ҳар бир вояга етган немис фуқаросига – эркаклар ва аёлларга – олти ойлик базавий ҳарбий хизматни, кейинчалик уни 17 ойгача узайтириш имконини беради. Эслатиб ўтамиз, Германия 2011 йилда тинчлик даврида мажбурий ҳарбий хизматни бекор қилган эди.