Қозоғистонда қиз ўғирлаш учун жазо жорий этилади

Қозоғистонда мажбурий никоҳ учун жиноий жавобгарлик жорий этиш режалаштирилмоқда. Бу ҳақда мамлакат парламентининг депутати Мурат Абенов маълум қилди. Депутатнинг сўзларига кўра, сўнгги уч йил ичида Қозоғистонда турмуш қуришга мажбурланган 214 шахсдан мурожаатлар келиб тушган. Шулардан фақат 10 нафари судга етиб борган, қолган юзлаб жиноий ишлар эса ёпилиб кетган.

 

Абеновнинг айтишича, "Қиз ўғирлаб кетилганини, машинадан сакраб тушганини, унга нисбатан куч қўлланганини исботлаган бўлсалар ҳам, улар ҳеч нарса қила олишмаган."

 

Парламент аъзолари томонидан яқин вақт ичида Мажлисда кўриб чиқиладиган тузатишлар ишлаб чиқилди. Янги қонун таклифига кўра, Қозоғистонда “қиз ўғирлаш” учун жазо жорий этилади ва бу ҳолат расмий равишда "мажбурий никоҳ" деб аталади. Депутат Абеновнинг сўзларига кўра, бу жараёнда жиддий жарима чоралари қўлланилади. Оғир ҳолларда, агар қиз 18 ёшга тўлмаган бўлса, куч қўлланган бўлса ёки бир гуруҳ шахслар иштирок этган бўлса, жиноий жавобгарлик янада оғирроқ бўлиб, 5-7 йилгача қамоқ жазоси қўлланиши мумкин.

 

Абенов, шунингдек, бу ўзгаришнинг жорий йилнинг охиригача кучга кириши мумкинлигини таъкидлади.

 

2025 йил февраль ойида Абенов, келин ўғирлаш учун жиноий жавобгарлик киритиш ташаббуси билан чиққан эди. Ўшанда у 3-5 йилга қамоқ жазоси ҳақида гапирган эди.

 

2024 йил февраль ойида Қозоғистоннинг Инсон ҳуқуқлари бўйича вакили Артур Ластаев Чимкентда шов-шувли тарзда келин ўғирлаб кетилганини маълум қилганди. Унинг сўзларига кўра, мажбуран турмушга чиққан қизлар кўпинча жинсий, жисмоний ва руҳий зўравонликка дучор бўлади.