Трамп 16 май куни Истанбулга бориши мумкин
Трамп: Ҳар ҳафта 5000 аскар ҳалок бўляпти – бу урушни тўхтатиш керак.
АҚШ президенти Доналд Трамп, агар зарурат бўлса, 16 май куни Истанбулга келишга тайёр эканини маълум қилди. У бу ҳақда Доҳада АҚШ ва Қатар ишбилармон доиралари вакиллари билан бўлган учрашувда айтиб ўтди. Истанбулда 15 май куни Россия ва Украина ўртасида 2022 йилдан бери илк бор ўтказилиши режалаштирилган тўғридан-тўғри музокаралар марказий эътиборда бўлиб турибди.
Трамп ўз баёнотида: “Менимча, биз Россия ва Украина билан яхши мулоқот қура оламиз. Ҳар ҳафта ўртача 5000 аскар ҳалок бўлмоқда — бу фожиавий рақам. Келинг, бу урушни қандай тугатиш мумкинлигини биргаликда кўриб чиқайлик. Истанбулга сафар қилишни ўйлаяпман, лекин ҳозирча бугун ва эртага жадвалимиз тўла. Шунга қарамай, агар зарурат бўлса, жума куни бораман”- дея таъкидлади.
Шунингдек, у Россия президенти Владимир Путиннинг ушбу музокараларда иштирок этмаслигини таъкидлаб ўтди. Трампнинг сўзларига кўра, айни дамда АҚШ вакиллари музокараларда фаол иштирок этмоқда.
