Еврокомиссия TikTokни Европа қонунларини бузишда айблади
Фуқаролар кўраётган хабарларининг ортида ким турганини билишга ҳақли.
Еврокомиссия TikTok'ни Европа Иттифоқининг реклама шаффофлиги қонунларига риоя қилмасликда айблади. Рақамли масалалар бўйича Еврокомиссар Хенна Вирккуненнинг сўзларига кўра, “фуқаролар кўраётган хабарлар ортида ким турганини билишга ҳақлидир”. Бироқ TikTok ҳанузгача реклама эълонлари бўйича тўлиқ ва қулай очиқ маълумотлар базасини яратмаган.
Комиссия таъкидлашича, TikTok фойдаланувчиларга кўрсатиладиган шахсийлаштирилган рекламаларнинг ким томонидан молиялаштирилаётгани ва қайси гуруҳга қаратилгани ҳақида маълумот бермайди. Реклама архиви бўйича қидирув тизими эса шунчалик ноқулайки, деярли фойдасиз ҳисобланади.
Мазкур ҳолат айниқса сайловлар фонида муҳим аҳамият касб этмоқда. Еврокомиссия Руминияда ўтган президентлик сайловларидан сўнг ТикТокъга нисбатан суриштирув бошлади. Платформа ультрамиллатчи номзод Келин Жоржескуга оид видеони сиёсий реклама сифатида белгиламаган. Сайлов натижалари Россия аралашуви шубҳалари сабабли бекор қилинган эди.
TikTok'га нисбатан бошқа терговлар ҳам давом этмоқда. Хусусан, Европа расмийлари платформани вояга етмаган фойдаланувчиларни зўравонлик контентидан етарли даражада ҳимоя қилмагани учун танқид қилмоқда. Агар айбловлар исботланса, компанияга катта миқдорда жарималар солиниши мумкин.
