Зеленский Эрдўған билан учрашди
Учрашув ёпиқ эшиклар ортида бўлиб ўтди.
Бугун, 15 май куни Украина Президенти Владимир Зеленский расмий ташриф билан Туркияга келди ва Анқарада Президент Ражаб Тойиб Эрдўған билан учрашув ўтказди.
Зеленский Туркияга етиб келгач, Эсенбўға халқаро аэропортидан бевосита Президент саройига йўл олди. У ерда уни Президент Эрдўған тантанали тарзда кутиб олди. Икки раҳбар сарой зинапоясида, Туркия ва Украина байроқлари фонида анъанавий суратга тушиш маросимини ўтказди.
Учрашув ёпиқ эшиклар ортида бўлиб ўтди. Унда Туркия Миллий мудофаа вазири Яшар Гулер, Миллий разведка ташкилоти раҳбари Иброҳим Калин ва Президентнинг ташқи сиёсат ва хавфсизлик бўйича бош маслаҳатчиси Акиф Чағатай Қилич иштирок этди.
Президентлар ўртасидаги икки томонлама музокаралардан сўнг, кечки овқат кўринишида кенгайтирилган делегациялар учрашуви ўтказилиши режалаштирилган.
Эрдўған ва Зеленский учрашувида Россия-Украина уруши юзасидан сўнгги вазият, шунингдек, ўт очишни тўхтатиш ҳамда тинчлик музокараларини бошлаш имкониятлари кенг муҳокама қилинмоқда.
