АҚШнинг йирик криптовалюта биржаси хакерлик ҳужумига учради
Coinbase'дан 20 миллион доллар товон талаб қилинди.
АҚШнинг энг йирик криптовалюта биржаларидан бири — Coinbase киберҳужум нишонига айланди. Маълум қилинишича, хакерлар мижозларга оид махфий маълумотларни қўлга киритган ва уларни ошкор қилмаслик эвазига компаниядан 20 миллион доллар талаб қилган.
Ҳужумдан сўнг Coinbase акциялари Нью-Йорк фонд биржасида 5,4 фоизга арзонлашди. Бу, айниқса, компания акциялари бир кун аввал биржа индексига киритилганидан сўнг 25 фоизга ошган эди.
Расмий баёнотга кўра, хакерлар мижозлар рўйхатини қўлга киритиб, улар номидан алдов кампаниялари ташкил қилган. Сўнг, фош бўлмаслик учун Coinbase'дан катта миқдорда пул талаб қилишган. Компания бу талабни рад этганини билдирган.
Coinbase жиноятчиларни аниқлашга ёрдам берувчи ҳар қандай ахборот учун 20 миллион долларлик мукофот эълон қилди. Ҳозирча ҳужум ортида ким тургани аниқ эмас, аммо тергов ишлари давом этмоқда.
Крипто соҳасидаги хавфсизлик билан шуғулланувчи Chainalysis компаниясининг маълумотларига кўра, ўтган йилда криптобиржаларга уюштирилган киберҳужумлар натижасида 2,2 миллиард доллар зарар етказилган. Бу кўрсаткич аввалги йилдагига нисбатан 21 фоизга ошган бўлиб, энг йирик қисмини Осиё-Тинч океани минтақаси ва Шимолий Корея билан боғлиқ хакер гуруҳлари ташкил қилади.
Coinbase жабрланган мижозларга 180–400 миллион доллар оралиғида компенсация тўлайди, дея маълум қилди компания матбуот хизмати.
