Японияда ирқий камситиш муаммоси кескинлашмоқда

 

Япониянинг Осака шаҳридаги ресторанларнинг бирида хитойлик мижозларга хизмат кўрсатмаслик тўғрисида чиқарган қарори кенг жамоатчилик норозилигини келтириб чиқарди.

 

Ресторан эшигига осилган ёзувда Хитойдан келган меҳмонларга хизмат кўрсатилмаслиги аниқ баён этилган. Ресторан вакиллари бу қарорни баъзи хитойлик мижозларнинг “қўпол ва тартибсиз хатти-ҳаракати” билан изоҳлашган. Ижтимоий тармоқларда ушбу ҳолат юзасидан кескин баҳс-мунозаралар авж олган — айримлар бу қарорни тушунишга ҳаракат қилса, бошқалар уни очиқ камситиш деб баҳоламоқда.

 

Бу Япония бизнес соҳасида хитойликларга нисбатан билдирилган илк норасмий санкция эмас. 2023 йилда Токиодаги бир ресторан хитойлик блогерга “Хитой вируси” хавфини сабаб қилиб, киришни тақиқлаган эди. 2024 йил июль ойида эса бошқа бир Токиодаги кафе хитойлик ва жанубий кореялик сайёҳларни қабул қилмаслигини эълон қилган.

 

Япония қонунчилигига кўра, тил тўсиқлари ёки коммуникация муаммолари асосида мижозларга хизмат кўрсатишни рад этиш мумкин. Бироқ мамлакат конституциясида ирқий ёки миллий белгилар асосида камситиш қатъиян ман этилади. Шу боис, айрим япон юристлари бу каби ҳолатлар конституциявий нормаларга зид келишини таъкидламоқда.

 

Бу воқеа Япония ва Хитой ўртасидаги ижтимоий ва дипломатик муносабатларда сезиларли тарангликни юзага келтириши мумкин.