Италия Украинага 3 миллиард евролик қурол етказиб берди
Италия Украина учун захирадаги қуролларни сафарбар этган.
2022 йилдан бери Италия Украинага тахминан 3 миллиард евро миқдорида қурол-яроғ ва ўқ-дорилар етказиб берган. Бу ҳақда Италия мудофаа вазири Гуидо Крозеттонинг парламент хавфсизлик қўмитаси ёпиқ йиғилишида маълум қилган.
Маълумотларга кўра, бу қурол-яроғ Украинага алоҳида харид қилинмаган, балки Италия қуролли кучлари омборларида йиллар давомида тўпланган ортиқча захиралардан иборат. Шу билан бирга, 11 май куни Италия Ташқи ишлар вазирлиги ҳам Рим томонидан Киевга ҳарбий ва гуманитар эҳтиёжлар учун 2,5 миллиард евро йўналтирилганини маълум қилган.
Вазир Крозеттонинг сўзларига кўра, Украинага асосан эскирган техника юборилган бўлсада, бу Италия учун миллий арсеналларни тўлдириш заруратини юзага келтирган. Шу сабабли Бош штаб бошлиғига мамлакатдаги барча мавжуд қурол-яроғларни қайта инвентаризация қилиш топширилган.
2022 йилдан бери Италия Украинанинг ҳарбий эҳтиёжларини қоплаш учун 10 та ҳарбий ёрдам пакетини тузган. Илгари хабар қилинганидек, 11-ёрдам пакетига 400 дона М113 зирҳли транспортёр киритилган бўлиб, уларнинг утилизацияси уларни Украинага жўнатишдан қимматроққа тушиши мумкин эди.
Юборилган ҳарбий ёрдам тафсилотлари расман таснифланган бўлсада, маҳаллий ОАВ айрим маълумотларни эълон қилиб келмоқда. Хусусан, илгари Киевга М113 БТР ва САМП/Т зенит-ракета мажмуалари юборилгани ҳақида хабарлар тарқалган.
