Сурия босмахоналарни ўзгартирмоқчи
Сурия банкнотлари энди БАА ва Германияда босилиши мумкин.
Хабарларга кўра, Сурия ҳукумати миллий валютаси — Сурия фунтини чоп этиш ишларини Бирлашган Араб Амирликлари ва Германияга кўчириш имкониятларини анчадан бери ўрганиб келмоқда. Шу вақтгача, яъни сўнгги ўн йилдан ортиқ вақт давомида Сурия банкнотлари Россияда босиб чиқариларди.
Европа Иттифоқи бу йил февраль ойида Дамашққа нисбатан санкцияларни юмшатганидан сўнг, бу борадаги ҳаракатлар жадаллашган.
Хабарларга кўра, Германияда икки компания — Бундесдрускереи (давлат корхонаси) ва Гиесеске+Девриент (хусусий компания) Сурия пулларини чоп этишга қизиқиш билдирган.
Янги Сурия раҳбарияти нафақат босмахона локациясини ўзгартиришни, балки банкнотлардан собиқ президент Башар Асаднинг портретини олиб ташлаб, пул дизайнини янгилашни ҳам режалаштирмоқда.
Маълумот учун, Россия 2012 йилдан буён Сурия фунтини чоп этиб келмоқда. Бунгача эса бу ишни Австриядаги компания бажарган, аммо Европа Иттифоқи томонидан Сурия фуқаролар уруши сабабли киритилган санкциялар ортидан шартнома бекор қилинган эди.
