ЖССТ молиявий инқирозга юз тутмоқда
Шу сабабли ташкилот ходимларни қисқартирмоқчи.
Жаҳон соғлиқни сақлаш ташкилоти (ЖССТ) молиявий инқироз туфайли ўз фаолиятида кескин қисқартиришларга боришга мажбур бўлмоқда. Маблағ етишмовчилиги сабабли ташкилот ходимлар сонини қисқартириш билан бирга, бўлимлар сонини ҳам 76 тадан 34 тагача камайтирмоқда.
Бу ҳақда ЖССТ Бош директори Тедрос Адҳаном Гебреесус расмий баёнот берди. Унинг айтишича, ташкилот раҳбариятининг ижрочи таркиби ҳам 14 кишидан 7 кишигача қисқартирилган.
Гебреесус ЖССТ келгуси икки йил ичида 500 миллион доллардан ортиқ маош тақчиллигига дуч келишини маълум қилди. Бу эса нафақат ташкилот ички тузилмасига, балки глобал соғлиқни сақлаш ташаббуслари ва инқирозга жавоб чораларига ҳам салбий таъсир кўрсатиши мумкин.
ЖССТ дунё миқёсида пандемиялар, юқумли касалликлар, озиқланиш муаммолари ва бошқа глобал соғлиқ муаммоларига қарши курашда асосий ташкилот саналади. Молиявий ресурсларнинг камайиши унинг бу борадаги имкониятларини кескин чеклаши мумкин.
