Британиялик ўсмирларнинг ярми интернетсиз дунёни орзу қилади
Ёшларнинг 46 фоизи “рақамли болалик”ни рад этади.
Янги социологик тадқиқот натижаларига кўра, 16 ёшдан 21 ёшгача бўлган британияликларнинг қарийб ярми – 46 фоизи ёшлигини интернетсиз ўтказишни афзал кўрган бўлар эди.
The Guardian нашрининг хабар беришича, тадқиқот натижалари интернет, хусусан ижтимоий тармоқларнинг ёшларга психологик таъсирига жиддий эътибор қаратмоқда. Респондентларнинг 70 фоизи ижтимоий тармоқларда вақт ўтказгач, ўзини руҳий жиҳатдан ёмон ҳис қилишини билдирган.
Сўровда иштирок этган ёшларнинг ярми тунги вақтда айрим иловалар ва веб-сайтларга киришни чекловчи “рақамли комендантлик соати” ғоясини қўллаб-қувватлаган.
Шунингдек, иштирокчиларнинг 25 фоизи кунига тўрт соатдан ортиқ вақтини ижтимоий тармоқларга сарфлайди. 42 фоизи эса ота-онаси ёки васийларига интернетдаги фаолияти ҳақида ёлғон маълумот беришини тан олган.
Тадқиқотда қизиқарли ҳолатлардан бири — 27 фоиз респондент интернетда ўзини бутунлай бошқача шахс сифатида кўрсатишини билдирган. 40 фоиз ёшлар эса аноним профиллардан бошқа одамларни «кузатиш» ёки ижтимоий босимлардан четда қолиш мақсадида фойдаланишини айтган.
Бу сўров Буюк Британия ҳукуматининг ижтимоий тармоқларга нисбатан қаттиқроқ назорат ўрнатиш, ҳатто уларни маълум соатларда вақтинча ўчириш ҳақидаги таклифлари фонида ўтказилган.
