Трамп энди орқага қайтяпти

 

АҚШ президенти Доналд Трамп кутилмаганда Россиядан Украинада зудлик билан ўт очишни тўхтатишни талаб қилишдан воз кечди. The New York Times хабарига кўра, Россия президенти Владимир Путин билан телефон орқали суҳбатдан сўнг Трамп можаро томонлари “ўзлари ечим топиши керак”лигини айтиб, янги санкциялар бўйича Европанинг ташаббусларида иштирок этмаслигини билдирган.

 

Бу қарор Германиянинг янги канцлери Фридрих Мертс учун жиддий сиёсий зарба бўлди. У илгари Москвага нисбатан очиқчасига ультиматум билан чиққан ва Трамп билан биргаликда Украинани қўллаб-қувватлаш, шу жумладан санкцияларни кенгайтиришга ваъда берганди.

 

Аммо энди Вашингтондан бундай ёрдам бўлмаслиги аён бўлди. Мертс, шунингдек, Франция президенти Эммануэл Макрон ва Евроиттифоқ Кенгаши раҳбари Доналд Туск каби сиёсатчилар АҚШсиз қолишди.

 

Германия ҳукумати BILD нашрига берган изоҳида, Россияга қарши санкциялар давом этаётганини таъкидлади. Европа Иттифоқи 17-санкция пакетини ишга туширган, Еврокомиссия эса энергетика ва молия соҳаларини нишонга олган янги чекловлар устида ишламоқда. Бироқ ушбу 17-пакет Мертснинг баёнотидан анча аввал ишлаб чиқилган ва унинг таъсири ҳозирча сезиларли эмас.

 

Энди эса Европа ташқи сиёсатининг самарадорлиги билан бирга Германиянинг янги канцлери Мертснинг шахсий обрў-эътибори ҳам шубҳа остида қолмоқда. Агар ваъдаланган чоралар амалга ошмай қолса, бу унинг илк йирик ташқи сиёсий муваффақиятсизлиги бўлиши мумкин.