АҚШ Россияга етиб бора оладиган ракетани синовдан ўтказди
Бу синов ҳар йили режали тарзда ўтказилади.
АҚШ 21 май куни Minuteman III русумидаги қитъалараро баллистик ракетасини муваффақиятли синовдан ўтказди. Deutsche Welle’нинг ёзишича, ушбу ракета Россияга етиб бора оладиган имкониятга эга бўлиб, синов Калифорниядаги Ванденберг авиабазасида амалга оширилган.
АҚШ Ҳарбий-ҳаво кучлари маълумотларига кўра, бу синов ҳар йили режали тарзда ўтказилади ва мамлакатнинг стратегик ядровий кучларининг ишончлилигини намойиш этиш ҳамда иттифоқчиларига хавфсизлик кафолатини таъминлашга хизмат қилади. Ракета битта Mark-21 High Fidelity жанговар каллаги билан жиҳозланган бўлиб, Тинч океанидаги махсус синов ҳудудигача 6 700 километр масофани босиб ўтган.
Minuteman III — АҚШ армиясида 1970 йилдан бери хизмат қилаётган қаттиқ ёқилғили қитъалараро баллистик ракетадир. Унинг максимал парвоз масофаси 9 500 километрдан ортиқ, оғирлиги тахминан 36 тонна ва ҳаракат тезлиги соатига 24 минг километрга етади. Айни пайтда Қўшма Штатлар бундай 400 дона ракетага эга бўлиб, ҳар бири учтагача ядро каллагини олиб юришга қодир.
Ушбу синов Россия Хавфсизлик кенгаши раиси ўринбосари Дмитрий Медведевнинг Ғарбни “учинчи жаҳон уруши хавфи” билан огоҳлантирган баёнотидан бир кун ўтиб амалга оширилди. Медведев Петербург халқаро юридик форумида сўзлаган нутқида Ғарб мамлакатларининг Москвага нисбатан олиб бораётган сиёсати дунёни глобал можарога яқинлаштираётганини таъкидлади. У, шунингдек, Украинадаги ҳар қандай тинчликпарвар кучлар Россия учун “қонуний ҳарбий нишон” бўлиши мумкинлигини айтди.
