АҚШ вақтинчалик ҳимоя олган мигрантларни чиқариб юбормоқчи

 

The Washington Post нашрининг ёзишича, АҚШ Ички хавфсизлик вазирлиги ҳужжатларига асосланиб, Трамп маъмурияти можароли ҳудудлардан қочиб келган ва вақтинчалик ҳимоя мақомида бўлган қочқинларни мамлакатдан чиқариб юбориш учун 250 миллион долларлик хорижий ёрдам маблағларини сарфлаш режасини ишлаб чиққан.

 

Режада 200 мингдан ортиқ украиналик ва 500 мингга яқин гаитилик мигрантлар депортация қилиниши мумкинлиги айтилган. Улар ҳозирда Байден маъмурияти томонидан берилган “вақтинчалик муҳофаза” дастури асосида АҚШда яшаб келмоқда. Шунингдек, ҳужжатларда афғонлар, фаластинликлар, ливияликлар, суданликлар, сурияликлар ва яманликлар ҳам тилга олинган.

 

Лойиҳага кўра, уларни ватанларига қайтариш харажатлари хорижий ёрдам жамғармаси ҳисобидан қопланган бўлади. Аслида эса бу маблағлар одатда қочқинларга ёрдам кўрсатиш ёки уларнинг ватани барқарорлашгач қайтариш учун ажратилади.

 

БМТ Миграция ташкилоти эса бу тоифадаги одамларни ватанига мажбуран қайтаришни қўллаб-қувватламаслигини билдирган.

 

АҚШ Ички хавфсизлик вазирлиги матбуот котиби Триша Маклафлин бу ҳужжатларни “эскирган” деб атаган ва Украина ёки Гаитига оид ҳеч қандай якуний қарор қабул қилинмаганини таъкидлаган.

 

Шунга қарамай, нашрнинг ёзишича, ўтган ҳафта Ички хавфсизлик вазирлиги ва Давлат департаменти 250 миллион доллар маблағ ажратилишини назарда тутувчи ҳужжатни имзолаган. Унда депортация жараёни тасвирланган, бироқ айнан қайси давлат фуқаролари ҳақида экани очиқланмаган.