2026 йилда самолётларда “тик ўриндиқлар” пайдо бўлиши мумкин
Бу самолётлардаги сиғим миқдорини 20 фоизга ошириши кутилмоқда.
Европанинг айрим арзон авиакомпаниялари 2026 йилдан бошлаб йўловчиларни тик ҳолатда ташишга мўлжалланган махсус ўриндиқларни синовдан ўтказишга тайёрланмоқда.
Лойиҳа арзон авиақатновлар сиғимини ошириш ва харажатларни камайтиришга йўналтирилган. “Туриб учиш” концепцияси асосида ишлаб чиқилган ўриндиқлар велосипед ёки от эгарига ўхшаш бўлиб, йўловчиларга фақат ярим эгилган ҳолатда турганча жойлашишга имкон беради. Ҳар бир жой хавфсизлик камарлари билан жиҳозланади.
Ўриндиқларни италиялик Aviointeriors компанияси ишлаб чиқмоқда ва бу янгилик жорий этилгач, самолётдаги умумий сиғим 20 фоизга ошиши мумкинлиги айтилмоқда. Бироқ лойиҳа ҳали расмий тасдиқланмаган ва авиакомпаниялар бу борада оммага аниқ баёнот бермаган.
Ижтимоий тармоқларда бу ғоя кескин танқидга учради. Фойдаланувчилар ҳазил билан “яқин орада йўловчилар қанотга кислород ниқоби билан боғланишади”, деган изоҳлар билан фикр билдиришган.
