АҚШда болалар орасида семириш хавфи ошмоқда
Мамлакатда ҳар йили семизлик туфайли 1,35 миллиард доллар сарфланмоқда.
АҚШ президенти Доналд Трамп мамлакатда болалар саломатлиги билан боғлиқ жиддий муаммоларга эътибор қаратди. Хабарларга кўра, Оқ уйда ўтказилган тадбирда Трамп сўнгги йилларда АҚШда болалар орасида семизлик ҳолатлари сезиларли даражада ошганини таъкидлади.
“Агар 1960 йилларда болаларнинг бор-йўғи 5 фоизи ортиқча вазнга эга бўлган бўлса, бугунги кунда бу кўрсаткич 20 фоиздан ошиб кетган”, — деди Трамп. У, шунингдек, мамлакатдаги болаларнинг 40 фоизида камида битта сурункали касаллик борлигини, 31 боладан биттасида эса аутизм аниқланаётганини билдирди. Таққослаш учун, бир неча ўн йил олдин бу кўрсаткич 10 000 боладан 1 нафарни ташкил этган.
Трамп, шунингдек, семизлик нафақат болалар орасида, балки ҳарбий хизматда ҳам жиддий оқибатларга олиб келаётганини эслатди. Аввалроқ маълум қилинганидек, АҚШ ҳарбийлари ҳар йили семизлик билан боғлиқ муаммоларни ҳал қилиш учун 1,35 миллиард доллар сарфлайди. Бу маблағнинг асосий қисми — 1,25 миллиард доллар тиббий даволаш харажатларига тўғри келади. Яна 99 миллион доллар эса маҳсулдорлик пасайишидан келиб чиқадиган йўқотишлар билан боғлиқ.
Мутахассисларнинг фикрича, ҳарбийлар орасида жисмоний тайёргарлик талабларининг пасайтирилиши ушбу харажатларнинг ошишига олиб келган.
