Авраам Линколннинг қонли қўлқоплари 1,5 миллион долларга сотилди
Линколнга оид тарихий буюмлар савдосидан жами 7,9 миллион доллар йиғилди.
Чикагода ўтказилган кимошди савдосида АҚШнинг 16-президенти Авраам Линколн билан боғлиқ қимматли тарихий артефактлар кутилганидан ҳам юқори нархларда харид қилинди. New York Post манбасига кўра, Линколннинг 1865 йил 14 апрель куни — у ўлдирилган кечада чўнтагида бўлган қонли қўлқоплари 1,5 миллион долларга сотилди. Ўша кечадаги рўмолчаси эса 826 минг долларга баҳоланди.
Аукционда, шунингдек, Линколн суиқасди билан боғлиқ уч нафар гумонланувчининг суратлари туширилган “қидирув” плакати 762 минг долларга харид қилинди. 1824 йилдаги дафтарда ёзилган, президентга оид энг қадимги қўлёзма намунаси эса 500 минг доллардан ошиқ нархда сотилди.
Мазкур савдолар Freeman's/Hindman аукцион уйи томонидан Линколн Президент Жамғармаси номидан ташкил этилган. Жамғарма АҚШ тарихидаги энг муҳим президентлардан бири — Авраам Линколнга тегишли 1500 га яқин артефактни ўз ичига олган коллекцияга эгалик қилади. Ушбу артефактлар Калифорниядаги коллекционердан сотиб олинган бўлиб, қарзнинг бир қисмини ёпиш мақсадида 144 та буюм сотувга қўйилган.
Аукцион якунида 136 та буюм сотилиб, жами 7,9 миллион доллар йиғилган. Бу маблағ савдони ташкил этган компаниянинг комиссиясини ҳам ўз ичига олади.
Авраам Линколн 1861–1865 йиллар давомида АҚШ президенти лавозимида фаолият юритган. У фуқаролар уруши чоғида мамлакатни бошқарган ва 1863 йилда қулликни бекор қилиш бўйича тарихий қарор қабул қилган. Иккинчи муддатининг биринчи ойида, Форд театрида суиқасд натижасида ҳалок бўлган.
