АҚШ Сенати Россияга 500 фоизлик божлар билан таҳдид қилди

 

АҚШ Сенатида икки партиявий ташаббус асосида Россияга қарши янги санкциялар лойиҳаси тақдим этилди. Демократ сенатор Ричард Блументҳал ва республикачи Линдсей Граҳам илгари сурган қонун лойиҳасига кўра, агар Россия яқин кунларда Украина билан ҳақиқий тинчликка олиб келмайдиган шартларни илгари сурса, унга 500 фоизлик иккиламчи божлар жорий қилиниши мумкин.

 

Ташаббускорлар баёнотида айтилишича, ушбу лойиҳани 81 нафар сенатор қўллаб-қувватламоқда. Улар АҚШ давлат котиби Марсо Рубио сўзларига таянган ҳолда, Россиянинг тез орада тинчлик шартлари бўйича таклиф билан чиқишини кутмоқда.

 

“Бу ҳужжат Россиянинг тинчликка қанчалик жиддий ёндашаётганини аниқлаштиради. Агар аввалгидек ноаниқ ва ҳақиқатдан узоқ таклифлар бўлса, Сенат қатъий чоралар кўради”, — дейилади сенаторларнинг қўшма баёнотида.

 

Мазкур ташаббус Доналд Трамп ва Владимир Путин ўртасидаги сўнгги музокаралардан кейин пайдо бўлди. Суҳбатдан сўнг Трамп Россияга нисбатан янги санкцияларни қўлламаслигини билдирган, Кремль эса шартсиз ўт очишни тўхтатишга қарши чиқиб, аввал музокара олиб борилишини талаб қилган. Бу позицияни Трамп ҳам қўллаб-қувватлаган.

 

Шунга қарамай, агар қонун лойиҳаси Конгрессда қабул қилинса ҳам, Трамп унга вето қўйиши мумкин. Ветонинг бекор қилиниши учун эса Сенат ва Вакиллар палатасида учдан икки қисм овоз талаб қилинади — бу эса республикачилар устунлик қилаётган шароитда анча мураккаб.