Энди iPhone телефонлар Америкада ишлаб чиқарилиши мумкин
Трамп ишлаб чиқариш заводларини АҚШга кўчирмоқчи.
АҚШ президенти Доналд Трамп Apple компаниясини iPhone смартфонларини хорижда эмас, балки бевосита АҚШ ҳудудида ишлаб чиқаришга чақирди. Унга кўра, агар компания бу талабларга жавоб бермаса, Apple маҳсулотларига 25 фоизлик бож жорий қилиниши мумкин.
"Мен Тим Кукка (Apple бош директори) бир неча бор шуни айтганман: iPhone'лар Ҳиндистон ёки бошқа жойларда эмас, айнан АҚШда ишлаб чиқарилиши ва йиғилиши керак. Акс ҳолда, улар камида 25 фоизлик бож тўлайди", — деб ёзди Трамп Truth Social платформасидаги саҳифасида.
Айни пайтда iPhone ишлаб чиқаришнинг катта қисми Хитойда амалга оширилади — бу мамлакат дунё бозорига етказилаётган қурилмаларнинг 75 фоизидан ортиғини ишлаб чиқармоқда. Ҳиндистон эса сўнгги йилларда ишлаб чиқаришда сезиларли ўсишга эришиб, ҳозирда глобал iPhone ишлаб чиқаришнинг 18 фоизини ташкил қилмоқда. 2024–2025 молия йили давомида Apple Ҳиндистонда тахминан 14 миллиард долларлик смартфон ишлаб чиқарган.
Трампнинг бу баёноти Apple'нинг етказиб бериш занжири ва глобал ишлаб чиқариш стратегиясига сезиларли босим ўтказиши мумкин. Компания ҳали ушбу даъвога расмий муносабат билдирмаган.
