Эверест чўққисига чиққан британияликлар тергов қилинмоқда
Улар рекорд даражада тез чўққини забт этгани учун сўроқ қилинади.
Непал ҳукумати Эверест чўққисига рекорд даражадаги тезликда чиққан Британия ҳарбийларига қарши расмий тергов бошлади. Сабаб – уларга оддий альпинистик жараёнлардан фарқли равишда ксенон газидан фойдаланиш орқали тезликда кўтарилишда ёрдам берилган бўлиши мумкинлиги.
Британиянинг фахрийлар ишлари бўйича вазири Ал Карнс бошчилигидаги гуруҳ – Британия махсус кучларининг собиқ аъзолари 21 май куни фақат 5 кун ичида Эверест чўққисини забт этишга муваффақ бўлишди. Бу ҳолат одатдаги икки ойлик иқлимлаштириш ва тайёргарлик жараёнларидан тубдан фарқ қилади.
Экспедиция аъзолари баландлик касаллигининг олдини олиш учун Германиядаги клиникада саёҳатдан икки ҳафта аввал ксенон газини нафас олиш амалиётидан фойдаланган. Бу газ гипокция (кислород етишмаслиги)нинг салбий таъсирини камайтиради.
Непал Туризм агентлиги раҳбари Нараян Прасад Регмига кўра, улар “Эверестга чиқишда ксенон газидан фойдаланган барча альпинистлар ва агентликлар устидан текширув бошлаб юборилганини” маълум қилди. Расмийларнинг таъкидлашича, илгари бундай усулдан Непал тоғларида фойдаланилмаган ва бу тажриба мамлакатда янгилик ҳисобланади.
Британия экспедицияси газни мамлакатга олиб кирилмаганини билдирмоқда. Уларнинг таъкидлашича, барча тайёргарлик чет элда амалга оширилган.
Экспедицияни ташкил этган Furtenbach Adventures (Австрия) компанияси эса ксенон газининг фойдали томонларини илгари сурмоқда — у иқлимлаштиришни тезлаштиради ва организмнинг баландликка мослашувини енгиллаштиради.
Бироқ, Непал парламенти аъзоси Ражендра Бажайн бу каби “сунъий” усуллар тоғ иқтисодиётига салбий таъсир кўрсатишини айтмоқда. Чунки иқлимлаштиришга кетадиган вақт қисқаргани сайин, маҳаллий йўриқчилар, ташувчилар ва хизмат кўрсатувчи ходимларга бўлган эҳтиёж камаяди, бу эса уларнинг даромадларига зарар етказади.
Непал ҳукумати ҳозирда экспедиция аъзоларини расман чақиртириш ва қонуний чоралар кўришни режалаштирмоқда.
