Францияда Telegram орқали фаолият юритган педофил тармоғи фош этилди

Францияда катта жамоатчилик эътиборини тортган жиноят фош этилди. Мамлакатда вояга етмаганларни ҳимоя қилиш бошқармаси Telegram мессенжерида фаолият юритган педофиллар тармоғини аниқлаб, 55 эркакни ҳибсга олди. Операция душанбадан пайшанбагача давом этди ва бутун мамлакат бўйлаб ўтказилди.

 

Ҳибсга олинганлар 25 дан 75 ёшгача бўлиб, улар 2024 йил ёзида ҳибсга олинган ва ўз фарзандларига нисбатан зўравонлик қилган хавфли жиноятчи билан Телеграм орқали алоқа қилганликда гумон қилинмоқда. Бу ҳақда Франция Вояга етмаганлар билан боғлиқ жиноятлар бўйича OFMIN оператив бўлинмаси раҳбари Квентин Беван маълум қилди.

 

Беваннинг айтишича, ҳибсга олинганлар орасида ҳар хил касб вакиллари, давлат хизматчилари, ҳарбийлар бор. Францияда болалар устидан жинсий зўравонлик материалларини сақлаш ва тарқатиш учун 5 йилгача озодликдан маҳрум қилиш ҳамда 100 000 евро (112 747 АҚШ доллари)гача жарима жазоси белгиланган.

 

Telegram вакили Реми Вон берган баёнотида компания 2025 йилда болаларга нисбатан зўравонликка оид контент билан боғлиқ 367 мингдан ортиқ гуруҳ ва канални ўчириш бўйича чоралар кўрганини билдирди.

 

Бу Telegram билан боғлиқ Франциядаги илк можаро эмас. 2024 йил августида Telegram асосчиси Павел Дуров Париждаги Бурже аэропортида ҳибсга олинган эди. Унга қарши зўравонлик материалларини тарқатиш сиёсатини етарли даражада назорат қилмаганлик каби айбловлар қўйилган. Кейинчалик Дуров ушбу айбловларни рад этган ва ҳукумат уни “бошқаларнинг ноқонуний ҳаракатлари учун уни шахсан жавобгар қилишга” уринаётганини таъкидлаган.