Маск сиёсий фаолликдан воз кечди

 

Америкалик миллиардер Илон Маск сиёсий фаолликдан воз кечишга қарор қилди. Бу ҳақда у Bloomberg нашрига берган интервьюсида баёнот бериб, “Мен шундоқ ҳам етарлича иш қилдим”, — деди.

 

Бироқ The Washington Post газетаси Маскга яқин манбаларга таяниб ёзишича, бу қарорнинг ортида оддийгина чарчоқ эмас, балки сиёсатдан кўнгли қолганлиги ётади.

 

“Охирги бир йил давомида сиёсат Маск ҳаётида марказий ўринни эгаллаган эди. Аммо эндиликда у бунга нисбатан қизиқишини йўқотган”, — дейди манбалардан бири.

 

Газетанинг ёзишича, Маск ўзининг молиявий қудрати орқали АҚШ сиёсий тизимига таъсир ўтказишига ишонган. Аммо воқелик унинг кутганидек бўлмай, бу уринишлар кўнгилсизлик билан якунланган. Сиёсий саъй-ҳаракатларининг кутилган самара бермагани Маскни умидсизликка туширган.

 

Шунингдек, манбаларнинг таъкидлашича, Маскнинг бундай қарорга келишида нафақат сиёсий натижаларнинг сустлиги, балки бу фаолиятнинг шахсий ва молиявий харажатлар жиҳатидан ортиб бораётгани ҳам роль ўйнаган.

 

Бундан ташқари, у ўз хавфсизлиги ва оиласининг тинчлиги борасида тобора кўпроқ хавотир ола бошлаган. Бу эса унинг сиёсий майдондан чекиниш қарорини янада қатъийлаштирган.