Австрия муҳожирларни қабул қилишдан воз кечиши мумкин

 

Австрия ҳукумати муҳожирларнинг 2026 йил ўрталарида оила билан бирлашиш ҳуқуқини бутунлай чеклашни режалаштирмоқда. Бу ҳақда мамлакат канцлери Кристиан Штокер ва ички ишлар вазири Герхард Карнер Financial Times газетасига берган интервьюсида маълум қилди.

 

Расмийлар таъкидлашича, Австрияда муҳожирлар оқими мамлакатнинг таълим, соғлиқни сақлаш ва ижтимоий хизматлар тизимига катта босим қилмоқда. Шу сабабли ҳукумат мигрантларнинг қариндошлари билан бирлашишига чеклов қўювчи квоталар жорий этишни режалаштирмоқда. “Бу квота нолга тенг бўлиши ҳам мумкин”, — деди Карнер.

 

Унинг сўзларига кўра, Австрия мактабларида немис тилини билмайдиган болалар сони кескин ошган, бу эса таълим тизимининг сифатига жиддий таъсир кўрсатмоқда. Шунингдек, расмийлар муҳожир болалар, айниқса Суриядан келганлар орасида жиноятчилик даражаси ошганини қайд этишди. Сўнгги беш йил ичида улар томонидан мингга яқин қонунбузарлик ҳолати аниқланган.

 

Бироқ бу ташаббус Европа Иттифоқидаги инсон ҳуқуқларини ҳимоя қилиш тамойиллари билан зиддиятга боради. Қочқинлар ва уларнинг оилаларини бирлаштириш ҳуқуқи Европа Инсон ҳуқуқлари конвенцияси томонидан кафолатланган.

 

Шунга қарамай, 22 май куни Австрия ва яна саккизта Европа давлати Европа Инсон ҳуқуқлари судини конвенцияни “ҳаддан ташқари кенг талқин қилаётганликда” танқид қилиб, жиноят содир этган муҳожирларни чиқариб юборишни соддалаштиришга чақирган эди.

 

Австрия ҳукумати аввалроқ, 12 март куни, айниқса Сурия ва Афғонистондан келган қочқинлар оқими сабабли оилаларни бирлаштириш ҳуқуқини вақтинча тўхтатган эди. Расмий статистикага кўра, 2023 йилда ушбу дастур орқали 9,300 киши, 2024 йилда эса 7,800 киши мамлакатга кирган.