Покистоннинг Ҳиндистон авиакомпанияларига нисбатан ҳаво тақиқи узайтирилди
Ҳиндистон авиакомпаниялари учун ҳаво ҳудуди 24 июнгача ёпиқ ҳолда қолдирилади.
Покистон ҳукумати Ҳиндистон авиакомпанияларига мамлакат ҳаво майдонидан фойдаланишни тақиқловчи қарорни яна бир ойга-24 июнгача узайтирди. Бу ҳақда Dawn нашри Покистон аэропортлар бошқармасининг расмий баёнотига таяниб хабар берди.
“Покистон ҳаво ҳудудидан Ҳиндистон самолётларининг фойдаланишига қўйилган чеклов 24 июнгача амал қилади”,— дейилади баёнотда. Унга кўра, Ҳиндистон авиакомпаниялари томонидан хизмат кўрсатиладиган рейслар Покистон ҳаво ҳудудида амалга оширилмайди.
Эслатиб ўтамиз, 24 апрель куни Покистон Ҳиндистоннинг барча авиакомпаниялари учун ўз ҳаво ҳудудини бир ойга ёпган эди. Ушбу қарорнинг узайтирилишига нималар сабаб бўлгани ҳозирча расман очиқланмаган, аммо икки давлат ўртасидаги мураккаб геосиёсий муносабатлар бу қарорга таъсир қилган бўлиши мумкин.
