Қозоғистонда чигирткаларга қарши дронлар ишга туширилади
Дронлар ёрдамида 300 минг гектардан ортиқ ерларга ишлов берилади.
Қозоғистонда чигирткаларга қарши курашиш учун илк бор агродронлар қўлланилиши режалаштирилмоқда. Бу замонавий технология биринчи бўлиб Ғарбий Қозоғистон вилоятида синовдан ўтказилади.
Мутасаддиларнинг айтишича, дронлар ёрдамида 300 минг гектардан ортиқ қишлоқ хўжалиги ерларига махсус ҳимоя воситалари билан ишлов берилади. Бу усул анъанавий техникаларга қараганда тезкорроқ ва аниқроқ ҳисобланади.
Йирик майдонларни қамраб олиш имконияти ва хавфсизлик даражаси юқори бўлган агродронлар, чигиртка каби зараркунандаларнинг тарқалишини чеклашда муҳим восита бўлиши кутилмоқда. Мутахассислар бу тажриба муваффақиятли ўтса, бошқа вилоятларда ҳам жорий этилиши мумкинлигини билдиришган.
