Ветнамда юк кемаси ҳалокатга учради
Фожиа оқибатида 10 киши бедарак йўқолган.
Ветнамнинг Вун-Тау портининг қирғоқ зонасида кўмир ташувчи “Конг Тхан” номли кема чўкиб кетди.
Маълумотларга кўра, кема бортида бўлган 11 нафар экипаж аъзосидан фақат биттаси қутқарилган, қолган 10 киши ҳозирча бедарак йўқолган деб ҳисобланмоқда.
“Конг Тхан” кемаси Қуангнин провинциясидан Куангбин провинциясига 4,9 минг тонна кўмир олиб кетаётган эди. Портга яқинлашаётган пайтда кеманинг двигатели ишдан чиққан. Шундан сўнг фавқулодда сигнал юборилган ва экипаж мустақил тарзда кемани тарк этишга уринган. Фақатгина бир денгизчи тирик ҳолда қутқарувчилар томонидан топилган.
Қутқарув ишларига балиқчиларга тегишли кемалар ҳам жалб этилган. Бироқ ҳалокат содир бўлган ҳудудда ноқулай об-ҳаво — кучли шамол, ёмғир, баланд тўлқинлар ва чақмоқ — қидирув ишларини сезиларли даражада қийинлаштирмоқда.
