Олимлар Африка ерларини қурғоқчиликдан қутқариш йўлини топди

Африкада суғориш имкониятлари юқори бўлишига қарамай, қитъадаги қишлоқ хўжалигининг аксарият қисми ҳали ҳам ёмғирга боғлиқ ва иқлим ўзгаришига қарши ҳимоясиз бўлиб қолмоқда. Бу ҳолат озиқ-овқат хавфсизлигига жиддий таҳдид туғдираётгани сабаб, БМТ университети раҳбарлигидаги Сув, атроф-муҳит ва соғлиқни сақлаш институти (UNU-INWEH) бир қатор халқаро ҳамкорлар билан биргаликда Африка Иттифоқи учун янги таҳлилий ҳисоботни эълон қилди.

 

Хабарларга кўра, ҳужжатда қитъа бўйлаб суғориш тизимларини кенгайтириш иқлим хавфига мослашиш ва ҳосилдорликни ошириш йўлида муҳим қадам сифатида кўрсатилган. Бироқ, экспертлар бу жараён экологик, ижтимоий ва бошқарув жиҳатларини ҳисобга олган ҳолда олиб борилиши кераклигини таъкидламоқда. Хусусан, ландшафтнинг ўзгариши, сув ифлосланиши, маҳаллий ҳокимият тузилмаларидаги ўзгаришлар ва сув ресурсларидан адолатли фойдаланиш каби масалалар алоҳида қайд этилган.

 

“Барқарор суғориш фақат ҳосилдорлик ҳақида эмас. Бу — одамлар ва табиатга фойда келтирувчи адолатли ва барқарор озиқ-овқат тизимларини шакллантириш ҳақида”, — деди лойиҳа раҳбари, профессор Тафадзва Мабҳаудҳи.

 

Стратегияни ишлаб чиққан Африка Иттифоқи комиссияси эса сув ресурсларини бошқаришда тизимли ва изчил ёндашувни таклиф қилмоқда. Мутахассислар бу стратегияни қитъа аграр секторини ислоҳ қилиш ва озиқ-овқат хавфсизлигини таъминлашда бурилиш нуқтаси сифатида кўрмоқда.

 

UNU-INWEH директори, профессор Кавеҳ Маданининг таъкидлашича, “сув, энергия ва экологик тизимлар бўйича комплекс ёндашув Африканинг аграр салоҳиятини очиш ва иқлимий заифликларни камайтиришнинг асосий калитидир”.