Қозоғистонда келинни ўғирлаш маросими фожиа билан якунланди
Автоҳалокат натижасида келин вафот этган.
Қозоғистоннинг Олмаота вилоятида келинни ўғирлаш маросими вақтида юз берган йўл-транспорт ҳодисаси оқибатида қиз вафот этди.
Ҳодиса BAKAD — катта Олмаота ҳалқа автомобиль йўлида содир бўлган. Маълумотларга кўра, Мерседес-Бенз русумли автомобиль КИА билан тўқнашиб, ағдарилган. Авария натижасида салонда бўлган келин ҳодиса жойида ҳалок бўлган.
Машинада бўлган яна уч киши, жумладан куёв ҳам жароҳатланган. Автомобиль ҳайдовчиси ҳибсга олинган ва ҳозирда тергов изоляторида сақланмоқда. Ҳолат юзасидан жиноий иш қўзғатилди.
Қозоғистонда сўнгги йилларда келин ўғирлаш анъанасига қарши кураш кучаймоқда. Май ойида парламент депутати Мурат Абенов никоҳга мажбурлаш жиноятини алоҳида модда сифатида белгилаш ва етти йилгача озодликдан маҳрум қилиш жазосини жорий этишни таклиф қилган эди. Депутатнинг таъкидлашича, мавжуд қонунчилик барча ҳолатларни тўлиқ қамраб ололмаяпти, кўплаб шикоятлар эса судгача етиб бормайди.
