Хитойда балиқ етиштириладиган улкан кема қурилмоқда

Хитойда лосось балиқларини етиштириш учун мўлжалланган дунёдаги илк сузувчи балиқчилик кемаси қурилмоқда. Ушбу улкан кема 2025 йил июнь ойида топширилиши режалаштирилган.

 

Su Hai №1 номли кема Гуанчжоу шаҳридаги Huangpu Wenchong Shipyard кемасозлик заводида қурилмоқда. Узунлиги 250 метрга яқин бу лойиҳа 600 миллион юанга (тахминан 83,6 миллион АҚШ долларига) тушмоқда. Буюртмачи — Jiangsu Lianshen Marine Technology компаниясига кўра, кема йилига 8 000 тоннагача лосось балиқларини етиштириш имкониятига эга бўлади.

 

Сузувчи ферма анъанавий денгиз балиқчилик иншоотларидан фарқли равишда, тайфунлар ёки сувдаги зарарли ўсимликлар гуллаши ҳолатида хавфсиз ҳудудга кўчиб ўта олади. Бундан ташқари, балиқларни қайта ишлаш учун барча зарур ускуналар кеманинг ўзига жойлаштирилади.

 

Бугунги кунда Хитой лосось эҳтиёжининг 80 фоизини импорт орқали қоплайди. 2023 йилда мамлакат Норвегия ва Чилидан 100 минг тоннадан ортиқ лосось импорт қилган. Мутахассислар фикрича, 2030 йилга келиб бу рақам 200 минг тоннага етиши мумкин.

 

Сариқ денгизда иш бошлаши кутилаётган ушбу кема Хитойнинг ички бозор талабини ўз кучи билан таъминлашга хизмат қилади.