АҚШ хитойлик талабалар визаларини бекор қилмоқда
АҚШ хитойлик талабалар ва дастурий таъминотга қарши чоралар кўрмоқда.
АҚШ ҳукумати Хитой фуқароси бўлган баъзи талабалар учун визани бериш тартибини қатъийлаштирмоқда ва айрим ҳолларда визани бутунлай бекор қилиши мумкин. Бу ҳақда АҚШ Давлат котиби Марко Рубио ижтимоий тармоқдаги саҳифасида маълум қилди.
Рубионинг сўзларига кўра, янги чекловлар асосан Хитой Коммунистик партияси билан алоқадор ёки стратегик соҳаларда таҳсил олаётган талабаларни қамраб олади.
Шунингдек, у АҚШ Гонконгдан келаётган аризачилар учун ҳам виза сиёсатини қайта кўриб чиқаётганини таъкидлади. Янги қоидалар асосида виза расмийлаштириш жараёнида янада чуқурроқ хавфсизлик текширувлари ўтказилади.
Бундан ташқари, АҚШ маъмурияти Хитойнинг яримўтказгичлар ишлаб чиқаришида фойдаланиладиган дастурий таъминотга киришини чеклаш бўйича ҳам чоралар кўришни режалаштирмоқда.
Мутахассисларнинг фикрича, бу қарор АҚШ ва Хитой ўртасидаги технологик ва таълим соҳаларидаги кескин рақобатнинг яна бир кўриниши сифатида баҳоланиши мумкин.
