Оқ уй Америка технологияларининг Хитойга экспортини чеклади
Cadence, Synopsys ва Siemens EDA Хитой билан ишлашни тўхтатмоқда.
АҚШ президенти Доналд Трамп бошчилигидаги маъмурият Хитойга қарши навбатдаги технологик чекловларни жорий этди. Хабарларга кўра, АҚШ Савдо вазирлиги айрим Америка компанияларига Хитойга маҳсулот ва хизматлар экспортини тақиқлаган. Бу ҳақда CNN телеканали вазирликдаги исми ошкор этилмаган манбага таяниб хабар берди.
Расмийларнинг билдиришича, Савдо вазирлиги "Хитой учун стратегик аҳамиятга эга бўлган экспорт фаолиятини" қайта кўриб чиқмоқда. Шу муносабат билан айрим компанияларга экспорт лицензиялари вақтинча тўхтатилган, ёки янги лицензиялаш тартиблари жорий этилган.
Financial Times газетаси маълумотларига кўра, Трамп маъмурияти Хитойга яримўтказгичлар ишлаб чиқаришда қўлланиладиган дастурий таъминот экспортини ҳам чекламоқчи. Бу борада Cadence, Synopsys ва Siemens EDA каби етакчи компанияларга Хитойдаги мижозларга хизмат кўрсатишни тўхтатиш топширилган.
Хабар қилинишича, АҚШ Савдо вазирлигининг Саноат ва хавфсизлик бюроси бу ҳақдаги кўрсатмаларни расмий хат шаклида компанияларга юборган. Бироқ барча компаниялар бу билдиришномани олганми — ҳозирча аниқлаштирилмаган.
Мазкур чора АҚШнинг Хитой технологик тараққиётига нисбатан кескин назоратни кучайтиришга қаратилган ёндашувининг бир қисмидир.
