Покистонда ҳарорат рекорд даражага чиқди
Болалар оммавий равишда касалхонага ётқизилмоқда.
Покистонда ёзги жазирама ҳаёт учун хавфли даражага чиқди. Хабарларга кўра, Ҳайдаробод шаҳрида кундузги ҳарорат Цельсий бўйича 52 даражага етган— бу эса мамлакатда қайд этилган энг юқори кўрсаткичлардан биридир.
Жазирма иссиқлик аввало кичик ёшдаги болалар соғлиғига салбий таъсир кўрсатмоқда. Кўплаб чақалоқлар қуёш уриши, сувсизланиш ва бошқа асоратлар билан шифохоналарга ётқизилган. Шифокорларнинг айтишича, иссиқ ҳаво ва етарли совутиш тизимларининг йўқлиги болалар саломатлигини хавф остида қолдирмоқда.
Вазиятни янада оғирлаштираётган ҳолатлардан бири — электр энергиясининг кенг кўламда узилиши. Аҳоли яшайдиган ҳудудларда вентилятор ва совуткичлар ишламаяпти, одамлар ўзларини сув ҳавзаларида сузиш орқали совитишга ҳаракат қилмоқда.
Покистон ҳукумати аҳолига заруратсиз кўчага чиқмаслик, айниқса кундузи қуёш остида юрмасликни қатъиян тавсия қилмоқда. Фавқулодда хизматлар эса ёнғин, иссиқ уриши ва бошқа фавқулодда ҳолатларда зудлик билан жавоб беришга сафарбар қилинган.
Иқлим ўзгаришлари туфайли бундай экстремал ҳароратлар тобора кўпроқ кузатилмоқда.
