АҚШда 250 миллион асалари учиб кетди
Мутахассислар вазиятни назоратга олишга уринмоқда.
АҚШнинг Вашингтон штатида асалари тўла юк машинаси ағдарилиб кетиши натижасида 250 миллионга яқин асалари атрофга тарқалган. Бу ҳақда Вҳатсом округи шериф департаменти ижтимоий тармоқларда хабар берди.
Воқеа жойига зудлик билан ҳуқуқ-тартибот органлари ва асаларичилик бўйича мутахассислар жалб қилинган. Ҳодиса юз берган йўл қисми хавфсизлик чоралари кўрилгунига қадар вақтинча ёпилган.
Ҳашаротларни йиғиш ва назоратга олиш жараёни қутқарувчилар учун ҳам осон кечмади — айрим шериф ўринбосарлари ва тажрибали асаларичилар асалари чақишидан азият чеккан. Шунга қарамай, мутахассислар 24–48 соат ичида асаларилар уяларига қайтишига умид билдиришмоқда.
Юк машинасининг қандай сабаб билан ағдарилгани ҳозирча аниқланмаган, воқеа бўйича тергов ишлари давом этмоқда.
